પ્રાર્થના

૧. તમે ગમે તેમ પ્રાર્થના કરો. તેઓ ચોક્કસ સાંભળશે જ. કીડીનાં પગલાંનો અવાજ પણ તેઓ સાંભળી શકે છે.

૨.‘કોઈનું પણ બૂરું બોલવું નહીં, ક્ષુદ્ર જંતુનું પણ નહીં. તું જેમ ભક્તિ માટે ઈશ્વરની પ્રાર્થના કરે છે, તેમ કોઈનું પણ બૂરું બોલવાનો પ્રસંગ ન આવે એવી પણ તારે પ્રાર્થના કરવી જોઈએ.’

૩. ગમે તે રીતે તમે ઈશ્વરનું ઘ્યાન કરો, એનાં પાવક નામનું રટણ કરો; તમે જરૂર પ્રગતિ કરશો. ખાતી વખતે ખાંડમાંથી બનાવેલા રમકડાને તમે સીધું પકડો કે આડું એ મીઠું જ લાગશે.

૪. ભગવાનનું નામ લો, તેની સાથે સાથે પ્રાર્થના કરો કે જેથી ઈશ્વરમાં અનુરાગ આવે અને જે બધી ચીજો બે દિવસ સારુ, જેવાં કે પૈસા ટકા, માન, દેહ સુખ, એ બધાં ઉપરથી આસક્તિ ઓછી થઈ જાય, એવી પ્રાર્થના કરો.

૫. મન અને વાણી વ્યાકુળતાપૂર્વક એક વસ્તુ ઝંખે તો પ્રાર્થના સંભળાય જ. જે માણસ મોઢેથી બોલે, ‘આ બધું તારું છે, પ્રભુ!’ અને મનમાં માનતો હોય કે બધું પોતાનું છે તેની પ્રાર્થના નિષ્ફળ જાય છે.

૬. હોકાયંત્ર ઉપર દિશા બતાવતું હોય ત્યાં સુધી, વહાણ માર્ગ ચાતરે કે કોઈ ભયમાં આવી પડે એ ડર રાખવો નહીં. એ રીતે, મનરૂપી હોકાયંત્રની સોય ઈશ્વર તરફ જ ચીંધેલી હોય તો, જીવનનૌકાને કશો ભય નથી.

૭. એક વલણને ર્દઢ વળગી રહી ઈશ્વરને તમારો પોતાનો બનાવો તો જ એ તમારી પ્રાર્થના સાંભળશે.

૮. અચલ પ્રેમ અને ર્દઢ ભક્તિને માટે જગજ્જનનીને પ્રાર્થના કરો.

૯. ‘જેઓ ઈશ્વર માટે આંસુ સારે છે તેમના પર એની કૃપા ઊતરે છે, આ રીતે સારેલાં આંસુઓ તો આગલા જન્મોનાં પાપ ધોઈ નાખે છે.’

૧૦. મારા દીકરાઓ, ઈશ્વર ખૂબ કાળજી લેવાવાળો છે. તમે કરેલી દરેક પ્રાર્થના એ સાંભળે છે. વહેલો કે મોડો એ જરૂર દર્શન દેશે, ઓછામાં ઓછું મૃત્યુ સમયે તો દેશે જ.